Miðborgin tekur algerum stakkaskiptum á næstu árum

Formleg kynning á skipulagi Hörpureitsins hófst í dag þar sem til stendur að byggja um 63 þúsund fermetra hús á fjórum lóðum undir fjölbreytta starfsemi og íbúðarbyggð. Reiturinn gæti orðið full byggður eftir um þrjú til fjögur ár.

Útsýnið frá Arnarhóli, einu frægasta kennileiti í miðborg Reykjavíkur, mun taka algerum stakkaskiptum nái þessi byggingaráform öll fram að ganga. En þá verður útsýnið eitthvað í líkingu við það sem sjá má á þessari mynd.

 

Húsin á lóðunum neðst til vinstri á myndinni hér að ofan rísa þar sem nú eru bílastæði við hlið Tollhússins við Tryggvagötu. Um tíu þúsund fermetra hús rísa á hvorri lóð og verða íbúðir í húsinu næst Tollhúsinu en blönduð starfsemi í húsinu við Lækjargötuna.

Ef við færum okkur hins vegar yfir Geirsgötuna í átt að Hörpu verður hótelbygging í húsinu við hafnarkantinn en enn á eftir að bjóða út húsin þar fyrir framan sem verður gert þegar kynningu á deiliskipulaginu lýkur eftir um sex vikur.

Og þar sem nú er stór hola í jörðinni framan við Hörpu verður til ný göngugata í Reykjavík.

„Já, ný göngugata, ný verslunargata sem tengir Lækjartorg við Hörpu og mun vonandi og örugglega færa mikið líf í þetta hverfi.,“ segir Páll Hjalti Hjaltason formaður umhverfis- og skipulagsráðs Reykjavíkurborgar.

Til að koma í veg fyrir að vindsveipir myndist í nýju götunni verða vindbrjótar settir á útveggi. En húsin hafa almennt verið lækkuð frá fyrri tillögu úr sjö hæðum í sex. Og fólk mun einnig komast neðanjarðar um svæðið.

„Já, hérna er ráðgerður töluvert mikill bílakjallari sem tengist undir Geirsgötuna og alveg að Tryggvagötu. Þannig að það verður hægt að labba hér neðanjarðar alveg frá Hörpu að Lækjartorgi,“ segir Páll Hjalti.

Hvenær eru menn að gera sér vonir um að þessari gífurlega miklu uppbyggingu í miðbænum verði lokið?

„Framkvæmdir sem þessar taka alltaf þrjú, fjögur ár. Þetta eru miklar framkvæmdir. En maður vonar að þeir byrji sem fyrst. Það stendur alla vega ekki á skipulagsmálum lengur þegar þetta er búið (kyningin á deiliskipulaginu) eftir tvo mánuði,“ segir Páll Hjalti.

Þannig að árið 2017 eða 2018 gætu menn staðið þar sem holan mikla er fyrir framan Hörpu í dag og þar væru þá risnar nýjar og flottar byggingar?

„Já, það er ekki ólíklegt að þá værum við að labba eftir hinni nýju Reykjagötu,“ segir formaður umhverfis- og skipulagsráðs borgarinnar.