Sakar bæjarstjóra um að tala niður fjárhag Kópavogsbæjar

Guðríður Arnardóttir, fráfarandi oddviti Samfylkingarinnar í Kópavogi sakar Ármann Kr. Ólafsson bæjarstjóra sjálfstæðismanna um dómgreindarskort sem hún segir hafa nýjum hæðum þegar hann í kjölfar eigin upphrópana og gífuryrða hafi sjálfur farið fram á nýtt lánshæfismat fyrir bæinn. Í gær var tilkynnt um að lánshæfismat bæjarins hafi verið lækkað í kjölfar þess að minnihlutinn í bænum fékk tillögu um átak í húsnæðismálum samþykkta í bæjarstjórn með aðstoð Gunnars Birgissonar, sjálfstæðisflokki.

Guðríður segir að það hljóti að vera einsdæmi að bæjarstjóri standi á torgum úti og tali niður fjárhag bæjarins og sakar hún Ármann um að vinna beinlínis gegn hag Kópavogs. Guðríður segir að fjárútlát bæjarins muni nema um 1,8 milljörðum, en ekki þremur milljörðum, eins og Ármann hefur haldið fram og að sú fjárhæð muni dreifast á lengra tímabil en eitt ár.

Yfirlýsing Guðríðar fer hér á eftir í heild sinni:

„Dómgreindarskortur bæjarstjóra Kópavogs náði nýjum hæðum þegar hann í kjölfar eigin upphrópana og gífuryrða fór sjálfur fram á nýtt lánshæfismat fyrir bæinn.  Það hlýtur að vera einsdæmi að bæjarstjóri standi á torgum úti og tali niður fjárhag bæjarins.

Nákvæmlega engin ástæða var á þessum tímapunkti til þess að kalla eftir nýju mati.   Þarna vinnur Ármann Kr. Ólafsson bæjarstjóri beinlínis gegn hag bæjarins, keyrir sjálfur niður lánhæfismatið í tengslum við einhverja persónulegra innansveitarkróniku Sjálfstæðisflokksins í Kópavogi.

Bæjarstjóri er algjörlega að bregðast hlutverki sínu sem er að framfylgja vilja bæjarstjórnar en með þessu er hann að grafa undan lýðræðislegum ákvörðunum hennar.  Eins og bæjarstjóra hefur margoft verið bent á er hér um að ræða fjárútlát sem nema um 1,8 milljörðum og mun sú upphæð ekki falla öll til á árinu 2014.

Samt kýs bæjarstjóri að ýkja vænt útgjöld bæjarins og byggir því ósk sína um endurnýjað lánshæfismat á röngum forsendum.Við ítrekum að með þessari samþykkt meirihluta bæjarstjórnar er verið að koma til móts við fjölda fólks sem býr við óöryggi á leigumarkaði, afleitar aðstæður og jafnvel húsnæðisleysi.“