„Klórum okkur alltaf í kollinum yfir þessari staðreynd“

Samkvæmt þjónustukönnun Capacent Gallup eru Reykvíkingar almennt áóánægðari með þjónustu borgarinnar en íbúar fimmtán annarra sveitarfélaga á Íslandi.

Könnunin var gerð með árið 2012 til hliðsjónar og var hún til umræðu í borgarráði í morgun.

Meðal annars var spurt um hversu ánægðir íbúar sveitarfélaganna væru með að búa í viðkomandi sveitarfélagi. Þar hafnaði Reykjavíkurborg í 10. sæti í könnunni en Mosfellsbær, Akureyri, Seltjarnarnes og Garðabær komu best út. Reykjanesbær hafnaði í 16. og næsta sætinu.

Capacent Gallup hringdi í 10.198 manns á öllu landinu, 18 ára og eldri, og voru þeir handahófsvaldir úr Viðhorfshópi Capacent Gallup. Fjöldi svarenda var 5.363 eða 52,6% og þar af voru 947 Reykvíkingar sem svöruðu könnuninni.

„Af einhverjum ástæðum höfum við mælst lægra en önnur sveitarfélög í þessari könnun,“ segir Dagur B. Eggertsson, formaður borgarráðs, í samtali við Vísi.

„Á umræddu ári hækkar borgin aftur á móti í nokkrum þjónustuþáttum og ekki niður í neinum þeirra. Það má því segja að þetta séu skárri niðurstöðu en við höfum oft séð. Það hafa aftur á móti verið skrifaðar heilar bækur í Háskólanum hvernig megi skýra það út af hverju t.d. í sveitarfélögum með enga menningarstarfssemi séu íbúar ánægðari með menningarstarfsemi sveitarfélagsins en í Reykjavík.“

„Við notum svona kannanir til að bæta okkur og munum einnig nota þessa til þess. Þetta er í raun í samræmi við niðurstöður þessara könnunar síðustu sex til sjö ár en kannski heldur betra en síðustu ár. Það sem er athyglisvert í þessari könnun er að yngsta og elsta fólkið er almennt ánægðara. Ég tel mig vita að borgarbúar séu kröfuharðir og mér finnst þeir alveg mega vera það. Það er kannski tilhneiging í svona minni sveitarfélögum að halda mikið með sínum bæ og gefa því kannski hærri einkunnir. Reykvíkingar segja aftur á móti bara hug sinn og það er mjög hollt og gott.“

„Þetta var tekið til umræðu í borgarráði í morgun og það gerum við á hverjum ári. Við klórum okkur alltaf í kollinum yfir þessari staðreynd og þá skiptir ekki máli hvort maður er í meirihluta eða minnihluta. Það eru samt ákveðnar vísbendingar í þessari könnun fyrir okkur. Sá málaflokkur sem er neðstur í þessari könnum eru málefni aldraðra og ég held að það endurspegli ákveðin veruleika. Málefni aldraðra eru á könnu ríkisins. Við höfum viljað fá þau mál til okkar til þess að það sé hægt að veita heildstæðari þjónustu og þetta er okkur bara hvatning til að sækjast eftir því.“

Júlíus Vífill Ingvarsson, borgarráðsfulltrúi Sjálfstæðisflokksins segir aftur á móti:

„Það á að taka þau skilaboð sem í þessari könnun henni felast alvarlega. Augljóslega þarf að gera miklu betur. Reykjavíkurborg er að skrapa botninn og það er ekki ásættanlegt. Í samanburði við önnur sveitarfélög er minnst ánægja með málaflokka sem við erum öll sammála um að eigi að hafa forgang. Það eru t.d. grunnskólarnir og leikskólarnir sem minnst ánægja er með í borginni á öllu landinu og það sama á við um þjónustu við eldri borgara, þjónustu við fatlaða og þjónustu við barnafjölskyldur. Reykjavíkurborg er að setja meira fé en önnur sveitarfélög í málaflokka sem könnunin tekur til en það fé er bersýnilega ekki nýtt þannig að notendum þjónustunnar líki.“