Íslenskir neytendur beittir blekkingum

Landbúnaðarráðherra segir nauðsynlegt að stöðva þær blekkingar sem hafa tíðkast varðandi upprunamerkingar á landbúnaðarvörum í verslununum. Formaður Bændasamtakanna tekur undir með ráðherra enda sé það óþolandi hvernig skammtímahagsmunir einstakra fyrirtækja stofni góðri ímynd íslenskra landbúnaðarafurða í hættu.

Upprunamerkingar á fersku og frosnu nautakjöti hafa verið í gildi hérlendis síðan 2011. Það á hinsvegar ekki við um aðrar landbúnaðarvöru. Reglugerð frá Evrópusambandinu sem innleidd verður á Íslandi í lok þessa árs skyldar matvælaframleiðendur til að upprunamerkja allar landbúnaðarvörur. Formaður Bændasamtakanna telur hinsvegar nauðsynlegt að flýta gildistöku þessar laga enda hafi íslenskir neytendur verið beittir blekkingum.

„Já, það má alveg segja það. Ef að menn eru að markaðsetja innflutta búvöru eins og til dæmis kjötvöru sem er þítt upp og blandað saman við framleiðslu hér heima þá er það klárlega blekking og er óásættanlegt,“ segir Sindri Þorgeirsson, formaður Bændasamtaka Íslands.

Telurðu að fyrirtæki hafi vísvitandi nýtt sér þá staðreynd að ekki er krafist upprunamerkinga á annarri búvöru en nautakjöti?

„Ég veit ekki hvað ég á að segja um það en þessar fréttir segja okkur það að þetta er raunin. Þetta segir okkur líka að það er nauðsynlegt að setja þær reglur að hér sé nauðsynlegt að upprunamerkja allar búvörur,“ segir Sindri og bætir því að hætta sé á að svona starfshættir geti skaða ímynd landbúnaðar á Íslandi.

Landbúnaðarráðherra tekur undir orð Sindra um að blekkingum sé beitt þegar landbúnaðarvörur eru ekki upprunamerktar. Hann segir ekkert því til fyrirstöðu að flýta gildistöku laganna. Ekki sé þó með öllu ljóst hvenær það muni gerast.