Sorphirða í Reykjavík tefst vegna ófærðar

Losun sorpíláta við heimili í Reykjavík var hætt kl. 13.30 í dag sökum slæmra veðurskilyrða. Losa á átti tunnur í Árbæ, Norðlingaholti og í Grafarholti. Þetta kemur fram í tilkynningu frá Reykjavíkurborg.

Töf verður því á sorphirðu í borginni í þessari viku vegna þungrar færðar. Til að vinna upp töfina verður starfsfólk við sorphirðu að vinna fram eftir næstu daga og verður að störfum á laugardag ef veður leyfir. Vonast er til að hægt verði að losa allar tunnur fyrir jól eins og losunardagatal borgarinnar segir til um.

Borgarbúar eru vinsamlegast beðnir um að sjá til þess að aðkomuleiðir að tunnum séu greiðfærar þeim sem sinna losun ílátanna. Sérstaklega þarf að huga að því að hægt sé að opna sorpgerði og hurðir því þær geta átt það til að frjósa fastar.

Einnig þarf að moka tröppur á aðkomuleiðum og frá sorpgeymslum næstu daga og hálkuverja með sandi eða salti til að greiða götu starfsfólks við störfin. Komi til þess að ekki er hægt að losa tunnur vegna slæmra aðstæðna er ekki víst að það verði hægt fyrir jól.