Viðræður í gangi milli Kiel og Veszprem

„Bara að vinna Meistaradeildina hefði verið betra, ég var auðvitað gríðarlega svekktur eftir leikinn,“ sagði Aron Pálmarsson í útvarpsþættinum FM95BLÖ á föstudaginn.

„Ég er valinn verðmætasti leikmaðurinn og þú gagnrýnir mig samt,“ svaraði Aron hlæjandi þegar Egill Einarsson spurði hvað fór úrskeiðis í leiknum.

Aron er á förum frá Kiel og skrifaði undir hjá ungverska liðinu Veszprem á dögunum.

„Ég er búinn að semja við Veszprem en er með samning við Kiel til 2015. Það eru einhverjar viðræður í gangi milli félaganna því Veszprem vill fá mig strax. Ef það tekst ekki tek ég eitt ár í viðbót við Kiel, það þarf ekkert að pína mig til að spila með besta liði í heimi.“

Aron viðurkenndi að það væri skrýtin tilfinning að vera á förum.

„Það heillar mig mikið að prófa eitthvað nýtt. Áætlun liðsins er að verða besta lið í heimi á næstu árum. Þeir hafa aldrei unnið Meistaradeildina en ansi oft verið nálægt því,“ sagði Aron.

Viðtalið við Aron hefst eftir 40. mínútur og má heyra það hér fyrir ofan.