Varað við fárviðri á norðanverðum Vestfjörðum eftir hádegi

Veðurstofan spáir norðaustan ofsaveðri eða fárviðri (25 til 35 m/s) á norðanverðum Vestfjörðum eftir hádegi í dag.

Í tilkynningu frá Veðurstofunni segir að búist sé við að veður versni mikið á milli klukkan 14 og 15 á Hornströndum og við Ísafjarðardjúp, þar með talið á þéttbýliskjörnum í Djúpinu. Veðurhæðinni fylgir talsverð ofankoma.

Í kvöld og nótt gera spár ráð fyrir norðaustan 20 til 28 m/s og snjókomu eða éljum á öllum Vestfjörðum. Mikið dregur úr vindi fyrir hádegi á morgun.

„Fyrir norðan land er ört vaxandi lægð sem verður 945 hPa við mynni Húnaflóa síðdegis í dag. Vestan lægðarinnar er umræddur vindstrengur í fárviðrisstyrk. Spár gærdagsins gerðu ráð fyrir að þessi vindstrengur næði ekki inn á Vestfirði en nýjustu spár með greiningartíma 06 UTC í dag (þriðjudag) benda eindregið til þess,“ segir í tilkynningu.