Stjörnvöld í Bandaríkjunum og aðildarríkjum Evrópusambandsins samþykktu fyrr í dag umfangsmiklar viðskiptaþvinganir gegn Rússum vegna deilunnar í Úkraínu.
Viðskiptaþvingununum er beint gegn rússneskum aðilum í olíugeiranum, orkugeiranum og vopnaframleiðslu. Þá verður aðgengi rússneskra banka að fjármagni takmarkað.
Í frétt Reuters segir að aðgerðirnar séu liður í að auka þann kostnað sem leggst á rússnesk stjórnvöld vegna stuðnings þeirra við aðskilnaðarsinna í Úkraínu.
Rússar hafa hafnað ásökunum stjórnvalda í Bandaríkjunum og aðildarríkjum ESB um að hafa séð aðskilnaðarmönnum í austurhluta Úkraínu fyrir vopnum.
Til stendur að frysta eignir og takmarka ferðir ákveðinna einstaklinga en búist er við að listi með nöfnum þeirra einstaklinga sem þvinganirnar ná til verði birtur á miðvikudaginn.
Umfangsmiklar viðskiptaþvinganir gegn Rússum
