Átján þúsund börn deyja daglega

18 þúsund börn deyja daglega í heiminum af ástæðum sem hægt er að fyrirbyggja og oft með einföldum og ódýrum hætti, þetta kemur fram í árlegri skýrsluu UNICEF, Barnahjálpar Sameinuðu þjóðanna um stöðu barna í heiminum sem kom út í gær. 

Með markvissri bráttu gegn barnadauða síðastliðin ár hefur þó tekist að bjarga 90 milljón barna frá dauða. Tölurnar miða við að tíðni barnadauða hefði haldist sú sama og árið 1990 en mikill árangur hefur náðst frá þeim tíma.

UNICEF ætlar ekki að láta staðar numið fyrr en ekkert barn lætur lífið af orsökum sem sannarlega er hægt að koma í veg fyrir. Meginþráðurinn í skýrslunni er að hvert einasta barn skipti máli og mikilvægt sé að ná til allra barna.

Barnaþrælkun veruleiki 15 prósent barna

11 prósent stúlkna í heiminum eru giftar fyrir 15 ár aldur að því er fram kemur í skýrslunni.  Það ógnar rétti þeirra til góðrar heilsu, menntunar og verndar. Barnaþrælkun er veruleiki 15 prósent barna í heiminum og með því er átt við að þau séu látin stunda vinnu sem komi í veg fyrir að þau geta stundað nám og tómstundir. Vinnan stofni jafnvel lífi þeirra í hættu.

Í skýrslunni kemur líka fram að bæta þurfi fæðingarskráningar enn frekar. Ástandið hafi þó batnað mikið en enn séu 230 milljón börn hvergi skráð og þar með séu þau formlega ekki til. Þau börn eru útsettari fyrir skorti á grunnþjónustu og hvers kyns réttindabrotum.

Gríðarlegur árangur frá 1989

Gríðarlegur árangur hefur náðst frá því að Barnasáttmáli Sameinuðu þjóðanna var samþykktur árið 1989. Skólasókn í fátækustu ríkjum heims hefur sem dæmi aukist verulega og yfir 80 prósent barna á grunnskólaaldri í þeim löndum hefja nú nám í skóla. Á heimsvísu hafa aldrei fleiri stúlkur stundað nám en nú.

Dauðsföllum af völdum mislinga hefur fækkað um 82 prósent síðan árið 2000 en mislingar sem eru bráðsmitandi veirusýking og hefur verið ein helsta dánarorsök barna yngri en fimm ára í heiminum. Árangurinn má að miklu leyti rekja til aukinna bólusetninga.

Gangnasöfnun um hagi barna gerir þau sýnileg og verður til þess að hægt er að bregðast við þörfum barna og bæta réttindastöðu þeirra.

UNICEF leggur áherslu á að tölvfræði ein og sér breyti ekki heiminum en hún greiði hins vegar fyrir breytingum með því að draga fram hvar skóinn kreppi.

„Tölfræðigögn eru ekki bara tölur. Þau lýsa veruleika barna um allan heim. Þau sýna okkur hvaðan við komum og hvert beri að stefna. Gagnaöflun er gríðarlega mikilvæg fyrir aukna velferð barna,“ segir Stefán Ingi Stefánsson, framkvæmdarstjóri UNICEF á Íslandi, sem leggur áherslu á að með áreiðnalegri gagnaöflun sé hægt að þrýsta á um að réttindi allra barna verði virt.