Ekkert samkomulag í Makríldeilunni

Engin niðurstaða náðist í samningaviðræðum strandríkja í makríldeilunni í Björgvin í Noregi í dag. Fundi var slitið skömmu fyrir hádegi.

Sigurgeir Þorgeirsson formaður íslensku samninganefndarinnar sagði í samtali við fréttastofu að ekki sé búið að slíta viðræðum og að aðilar muni tala saman á næstu dögum. Komi fram einhverjar samkomulagshugmyndir verði aftur boðað til fundar.

Nokkuð þokaðist í samkomulagsátt varðandi skiptingu kvóta en enn er deilt um heildarafla. Sigurgeir segir að Íslendingar hafi haldið sig við vísindalega ráðgjöf en aðrar þjóðir geri kröfu um umtalsvert meiri veiði. Þá hafi fulltrúar Evrópusambandsins borið til baka þær fullyrðingar sem komu fram í frétt þýska tímaritsins Spiegel um að sambandið hafi í hyggju að beita Íslendinga og Færeyinga refsiaðgerðum.

„Okkur er tjáð af fulltrúum ESB að sú frétt í Spiegel sé orðum ofaukin og að hún [Maria Damanaki] hafi ekki tjáð sig með þessum hætti,“ segir Sigurgeir.