Fengu mygluð jólakort tveimur árum of seint

„Ég hvet alla sem sendu okkur í fjölskyldunni jólakort árið 2011 til þess að láta okkur vita, svo við getum sett þá aftur á jólakortalistann,“ segir Daníel Fannar Jónsson, sem fékk loksins jólakort frá árinu 2011 í hendurnar, rúmlega tveimur árum á eftir áætlun.

Jólakortin fundust í fjörunni á Álftanesi og voru nánast ónýt og voru illa lyktandi að sögn Daníels. „Þegar ég opnaði útidyrahurðina mætti mér ógeðsleg fýla. Samt var konan mín búin að pakka kortunum inn í poka. Fnykurinn yfirtók íbúðina.“

Daníel segir kortin vera ónýt. „Við náðum ekki að lesa neitt þeirra. Þau voru mygluð og ógeðsleg, þannig að við losuðum okkur bara við þau. Við vitum því enn ekki hverjir það voru sem sendu okkur þessi jólakort. Ég get samt allavega sagt að umslögin hafa örugglega verið fín þegar þau voru keypt,“ segir hann.

Rakið til bréfbera sem brást

„Við erum búin að rekja þetta til starfsmanns sem brást starfskyldum sínum og er ekki lengur í vinnu hjá okkur,“ segir Brynjar Smári Rúnarsson, forstöðumaður markaðsdeildar Póstsins. Hann segir fyrirtækið að biðjast velvirðingar á þessu leiðindamáli. „Við vitum að bréfin fundust í fjörunni úti á Álftanesi. Þegar við fengum þau í hendurnar voru þau blaut, sölt og mörg hver úldin. Við komum þeim bréfum til skila sem við gátum,“ útskýrir Brynjar. 

Hafði samband við lögreglu

„Ég var búin að stroka eitthvað af þessu fólki útaf jólakortalistanum,“ segir Úlfhildur Helga Guðbjartsdóttir, annar Álftnesingur sem fékk jólakortin alltof seint. „Mér finnst þetta ótrúlega leiðinlegt mál. Mér tókst að opna öll fjögur kortin sem ég fékk og get lesið eitthvað af textanum. Einhver voru frá kunningjum og vinum sem maður talar kannski ekki við dagsdaglega og ég hélt að þeir hefðu ákveðið að hætta að senda mér kort,“ útskýrir Úlfhildur.

Hún hafði samband við lögreglu þegar hún sá mynd af póstinum á Facebook. Hún segir unglingsstúlkur hafa fundið póstinn og sett mynd á netið. „Þetta er auðvitað alvarlegt mál. Þarna voru ljósmyndir og jólagjafir sem voru ekki að komast til skila.“