Stjórnarmeirihlutinn fallinn samkvæmt könnun Stöðvar 2

Meirihluti stjórnarflokkanna er fallinn samkvæmt nýrri könnun Stöðvar tvö og eina tveggja flokka stjórnin sem hægt yrði að mynda samkvæmt niðurstöðum hennar væri stjórn Sjálfstæðisflokks og Samfylkingar.

Sjálfstæðisflokkurinn bætir við sig einum þingmanni en Framsóknarflokkurinn tapar níu samkvæmt könnun Stöðvar tvö sem þýðir að mynda þyrfti nýja ríkisstjórn ef kosið yrði nú.

Sjálfstæðisflokkurinn mælist nú með 30,5  prósent en var með 26,7 prósent í kosningunum í maí, og fengi 20 þingmenn. Framsóknarflokkurinn mælist hins vegar með 15,1 prósent og tapar níu mönnum frá kosningum.

Samfylkingin bætir verulega við sig frá kosningum eða rúmlega 7 prósentustigum, fengi þrettán þingmenn og 20,2 prósent atkvæða. Björt framtíð mælist með 13,5 prósent og bætti við sig tveimur þingmönnum, Vinstri græn tapa tæpu prósenti, mælast nú með 10 prósent og tapa einum þingmanni, en Píratar myndu tvöfalda þingmannatölu sína og fá sex þingmenn og 9,2 prósent atkvæða.

Stjórnarflokkarnir fengu rúman meirihluta í kosningunum síðast liðið vor og 19 þingmenn hvor flokkur, eða 38 þingmenn til samans. Nú eru stjórnarflokkarnir komnir niður í 30 þingmenn en stjórnarandstöðuflokkarnir með 33. Samkvæmt þessu yrði aðeins hægt að mynda tveggja flokka meirihlutastjórn Sjálfstæðisflokks og Samfylkingar, en önnur stjórnarmynstur kölluðu á þriggja eða fjögurra flokka stjórn.