Embætti forstjóra Landspítala auglýst til umsóknar

Heilbrigðisráðherra hefur auglýst til umsóknar embætti forstjóra Landspítala. Undanfarna mánuði hefur Páll Matthíasson starfað sem forstjóri, en hann var skipaður eftir að Björn Zoega sagði starfi sínu lausu í september.

Gerð er krafa um mikla samskipta- og leiðtogahæfileika og þarf forstjóri að hafa háskólamenntun sem nýtist honum í starfi. Þá þarf hann einnig að búa yfir reynslu af rekstri og stjórnun. Umsóknarfrestur er til 21. febrúar.

Á vef velferðarráðuneytisins, þar sem hægt er að sjá frekari upplýsingar um starfið, segir að forstjóri beri ábyrgð á að Landspítali starfi í samræmi við lög, stjórnvaldsfyrirmæli og erindisbréf sem heilbrigðisráðherra setur. „Forstjóri ber ábyrgð á þeirri þjónustu sem spítalinn veitir og á því að rekstrarútgjöld og rekstrarafkoma sé í samræmi við fjárlög og að fjármunir séu nýttir á árangursríkan hátt. Forstjóri ræður aðra starfsmenn spítalans.

Hæfni umsækjenda verður svo metin af þriggja manna nefnd sem skipuð er af heilbrigðisráðherra. Ráðherra mun skipa í stöðuna til fimm ára í senn frá 1. apríl næstkomandi.