Rannsókn hafin á þáttum og þjónustu íbúa á Sólvangi

Velferðarráðuneytið hefur falið Embætti landlæknis að gera úttekt á faglegum þáttum þjónustu og aðbúnaðar íbúa á Sólvangi í Hafnarfirði.

Þessi úttekt er gerð í kjölfar umfjöllunar í fjölmiðlum þar sem stjórnendur á Sólvangi hafa lýst yfir að þjónustu við heimilismenn sé áfátt vegna ófullnægjandi mönnunar í kjölfar niðurskurðar.

Fram kemur í tilkynningu að velferðarráðuneytinu hafi lengi verið kunnugt um erfiðleika í rekstri Sólvangs og átt í tíðum samskiptum við stjórnendur hjúkrunarheimilisins vegna þessa. Tveimur sérfræðingum á þeirra vegum hafi verið falið að greina reksturinn og skoða hvernig hægt væri að bæta reksturinn.

Áhersla var lögð á að Sólvangur myndi uppfylla þær kröfur sem gerðar eru til hjúkrunarheimila og að rekstrarfé til stofnunarinnar væri ekki minna en framlög til annarra hjúkrunarheimila sem rekin eru með daggjöldum.