Gerplustelpur endurheimtu stolnu símana

Mikil gleði upphófst á æfingu hjá fimleikastúlkunum í Gerplu í dag þegar þjálfari stúlkanna stöðvaði æfinguna og tilkynnti þeim að lögreglan væri búin að endurheimta símana þeirra. Vísir greindi frá því í gær að níu farsímum hefði verið stolið með stelpurnar voru á fimleikaæfinu.

„Þjálfarinn kom og kallaði á okkur þegar við vorum í miðri æfingu. Við vissum alveg hvað var í gangi og hlupum fram á gang,“ segir Thelma Rut Hermannsdóttir, ein fimleikastúlknanna. Hún segir að margir hafi boðið fram hjálp sína og komið upplýsingum til lögreglu sem leiddu til þess að óprúttnu aðilarnir sem höfðu stolið símunum fundust

„Það var kona sem sá statusinn hjá þjálfaranum okkar þar sem hann bað fólk um að litast um eftir símunum. Hún hafði séð eitthvað grunsamlegt fyrir utan Gerplu sem passaði við það sem ein af okkur hafði séð hérna uppí Gerplu,“ segir Thelma. Lögreglan hafi síðan afhent þeim símana sína við mikinn fögnuð.

„Þetta var æðislegt. Það voru alveg píkuskrækir hérna á ganginum þegar við fengum símana. Þetta var alveg sérstaklega gaman því það var fullt af myndum í símanum mínum sem ég hélt að væru glataðar. Bæði frá því um jólin með fjölskyldunni og líka frá því við vorum í keppnisferð á Norðurlandamótinu. Síðan erum við með myndbönd í símunum af æfingum hjá okkur sem við notum til að bæta okkur og líka myndbönd af því þegar manni mistekst og lendir kannski á andlitinu. Það getur verið mjög gaman að eiga það,“ segir Thelma og hlær.

Thelma segir stúlkurnar vera mjög ánægðar með skjót viðbrögð lögreglu í málinu og að þær muni passa vel uppá símana sína í framtíðinni.

„Þetta er ekki að fara koma fyrir aftur. Við læstum símana tryggilega inní skáp meðan við kláruðum æfingu og mig langaði eiginlega ekkert að láta hann af hendi. Þetta eru bara jólin tvö,“ sagði Thelma Rut glöð í bragði símleiðis við blaðamann.