Hvað viljum við?

Hvenær ætla stjórnvöld að staldra við og ræða fjármál þjóðarinnar af ábyrgð? Áratugum saman hefur ríkissjóður verið rekinn með halla, en nú er mál að linni. Málið er einfalt, ríkið hefur ákveðið miklar tekjur á hverju ári og það eru þeir peningar sem þjóðin hefur úr að spila.

Hvenær ætla stjórnvöld að leggja það niður fyrir sig/þjóðina í hvað fólkið í landinu vill nota þessa peninga. Tekjur ríkissjóðs eru einfaldlega ekki nógu miklar til þess að við getum gert alla þá hluti sem stjórnvöld eru að reyna ár frá ári.

Vantar meiri pening

Við erum ekki með nægilega miklar tekjur til þess að…

vera með besta heilbrigðiskerfi í heimi

reka sendiráð úti um allan heim

bora jarðgöng í gegnum annað hvert fjall á landinu

halda úti sinfóníuhljómsveit á heimsmælikvarða

halda úti lífeyrisréttindum ríkisstarfsmanna í núverandi mynd

hafa stærsta partinn af vegakerfi landsins með bundnu slitlagi

reka menntakerfi sem allar þjóðir heimsins geta stært sig af

halda úti íslensku krónunni sem kostar okkur tugi ef ekki hundruð milljarða á ári

hafa fleiri hundruð manns á listamannalaunum

vera með ríkisútvarp/sjónvarp

vera með 8 háskóla á Íslandi

styrkja landbúnaðinn um tugi milljarða á ári

og svo framvegis.

Þurfum að taka á vandanum

Með þessum orðum er ég ekki að segja að ég vilji ekki gott heilbrigðis- og menntakerfi eða ég vilji leggja af alla menningu á landinu. Ég vil leggja undir þjóðina hvaða verkefni fólkið í landinu vill veita peningunum okkar í. Það er augljóst að við fáum einfaldlega ekki nægilega miklar tekjur í ríkiskassann svo að við getum haldið öllu þessu gangandi, alveg sama hvað okkur finnst persónlega þá eru tekjurnar of litlar. Daginn sem við viðurkennum það fyrir okkur og tökum á vandanum fer okkur sem lítilli eyþjóð að ganga betur.

Kosið á fjögurra ára fresti

Þetta er ekki flókið í framkvæmd. Á fjögurra ára fresti er kosið um það hvað fólkið í landinu vill í raun og veru gera við peningana sem ríkið hefur úr að moða.

Með þessu móti taka allir landsmenn þátt í ákvarðanatökunni um það hvað við gerum við peningana okkar. Það er jú þannig að ef landsmönnum er gerð grein fyrir því að við höfum bara úr x upphæð úr að moða og meira eigum við ekki. Þá getur enginn verið ósáttur ef meirihluti þjóðarinnar vill framkvæma ákveðna hluti og aðra ekki. Þetta er eina ábyrga leiðin fyrir litla og fámenna þjóð eins og okkur Íslendinga til þess að verja þeim fáu krónum sem við höfum úr að spila sameiginlega. Með þessu móti má reka ríkissjóð réttum megin við núllið ár frá ári í sátt og samlyndi við allt og alla.