Slysum stúta hefur fækkað frá 2008

Lögreglan á höfuðborgarsvæðinu stöðvaði 5815 ökumenn í desember síðastliðnum við eftirlit með ölvunar- og fíkniefnaakstri í umdæminu, samhliða almennu eftirliti. „Langflestir þeirra tóku afskiptunum mjög vel og raunar þökkuðu margir lögreglu fyrir að halda úti þessu eftirliti,“ segir í tilkynningu frá lögreglunni.

Alls voru 142 ökumenn handteknir í desember grunaðir um ölvunar- og/eða fíkniefnaakstur, samanborið við 114 ökumenn í desember 2012. Þá voru 1022 ökumenn stöðvaðir í tengslum við sérstakt eftirlit.

Í tilkynningunni segir að umferðaróhöppum eða slysum þar sem ökumenn eru grunaðir um ölvunarakstur hefur fækkað frá árinu 2008. „Sama þróun hefur einnig átt sér stað hvað viðvíkur ökumönnum, sem grunaðir eru um fíkniefnaakstur. Óhöppum þeirra og slysum í umferðinni hefur fækkað frá árinu 2011. Samkvæmt því virðist þróunin stefna í rétta átt.“

„Á þeim jákvæðu nótum leyfir lögregla sér að hrósa þeim yfirgnæfandi meirihluta ökumanna, sem aldrei léti sér detta í hug að aka undir áhrifum. Um leið hvetur hún þá ökumenn sem ekki hafa gætt að sér, eða telja sig líklega til að láta freistast í framtíðinni og aka undir áhrifum vímuefna, til að hugsa sig um tvisvar og gæta þannig að eigin öryggi en ekki síður að öryggi annarra. Markmið okkar allra hlýtur að vera að enginn aki undir áhrifum vímuefna.“

Af því tilefni minnir lögreglan á Umferðarsáttmálann sem vegfarendur skrifuðu undir á síðasta ári: „Ég fer aldrei af stað út í umferðina nema ég sé í ástandi til þess, hvort sem það er vegna vímu, andlegrar líðan, þreytu eða annarra þátta sem geta haft áhrif á hæfni mína til að taka þátt í umferðinni. Ég ek aldrei eftir að hafa bragðað áfengi.“