Matvæli verði upprunamerkt

Samtök atvinnulífsins, Bændasamtök Íslands og Neytendasamtökin undirrituðu á föstudag sáttmála um upprunamerkingar matvæla.

Með undirrituninni var formlega hleypt af stokkunum sameiginlegu átaki um bættar upprunamerkingar og mun átakið standa yfir út árið 2014. Sindri Sigurgeirsson, formaður Bændasamtakanna, segir sáttmálann afar mikilvægt skref í neytendavernd hér á landi.

„Það kom í ljós eftir fjölmiðlaumfjöllun uppá síðkastið að merkingum á matvælum var ábótavant og því var ákveðið að grípa til aðgerða,“ segir Sindri. Hann segir samstöðu hafa verið milli samningsaðila um undirritun sáttmálans og því hafi verið einboðið að draga þá saman.

Samkvæmt núgildandi reglum er ekki skylt að upprunamerkja kjöt á markaði hérlendis en það verður skylt frá desember 2014 í samræmi við reglugerð ESB sem þá tekur gildi.

„Þetta er viljayfirlýsing þessara aðila. Hún þýðir það að við ætlum ekkert að bíða eftir reglugerðum eða lögum heldur ætla allir að taka til í sínum ranni. Verkefnastjórn samstarfsaðilanna mun vinna með matvælaframleiðendum og innflytjendum að því að merkja upprunaland matvörunnar með skýrum hætti auk þess sem unnið verður að því að virkja neytendur og vinna að vitundarvakningu á meðal þeirra,“ segir Sindri.