Tekist á um verkaskiptingu í málefnum utangarðsfólks

Mikilvægt er að heilbrigðisyfirvöld og sveitarfélög eigi gott samstarf um málefni utangarðsfólks, segir Kristján Þór Júlíusson, heilbrigðisráðherra, en jafnframt sé mikilvægt að sett séu skýr mörk.

Hann segir grundvallarskyldu sveitarfélaga vera að tryggja framfærslu íbúa sinna enda hafi þau verið stofnuð til að sinna því hlutverki.

Heiða Kristín Helgadóttir, formaður starfshóps um nýja stefnu í málefnum utangarðsfólks, sagði nýlega í viðtali við Vísi að hún vildi sjá ríkið og önnur sveitafélög viðurkenna sinn hlut í vanda utangarðsfólks og þá sérstaklega hvað varðar heilbrigðisþjónustu enda ráði borgin ekki ein fram úr vandanum.

Kristján Þór segir það lögbundið verkefni borgarinnar að sinna þessum málaflokki. 

„Það er val kjörinna fulltrúa að forgangsraða fjármunum í verkefni sem þeim er áskilið að sinna. Það er vitað að sveitarfélög leggja fjármuni í önnur verkefni, sem ekki eru lögbundin, og það er þá val fulltrúanna. Í tilviki Reykjavíkurborgar er hægt að nefna Hofsvallagötuna og þá ákvörðun að setja fjármuni í breytingar á henni í stað annarra verkefna.“

Kristján segir hlutverk ríkis og borgar skýr. Það sé á ábyrgð ríkisns að reka stofnanaþjónustuna fyrir fólkið í landinu og ljóst sé að almennt þurfi að gera betur í geðheilbrigðismálum á landsvísu.

Eygló Harðardóttir, félags- og húsnæðismálaráðherra, segir Heiðu koma með áhugaverðar ábendingar í viðtalinu. 

„Ég er sammála því að það geti ekki verið vandi einstaks sveitarfélags að taka á málefnum utangarðsfólks. Ég skil vel að Reykjavíkurborg kalli eftir auknu samstarfi, verandi það sveitarfélag sem hefur fyrst og fremst sinnt þessum málaflokki. Það ættu fleiri sveitarfélög á landinu að axla ábyrgðina og efla samstarf við ríkið.“

Eygló segist leggja áherslu á að huga að húsnæðisúrræðum fyrir heimilislausa. „Það má ekki skilja þennan hóp endurtekið útundan og ég tel ástæðu fyrir okkur að fara vel yfir þær ábendingar sem koma frá starfshópnum sem vann skýrsluna.“

Vill að borgin taki sína ábyrgð á málaflokknum

Þorleifur Gunnlaugsson, varaborgarfulltrúi Vinstri grænna, sat í starfshópi um nýja stefnu í málefnum utangarðsfólks og kom með sértillögur að loknu starfi hópsins.

„Það vantar haldbærari úrræði í stefnuna enda er ekkert að finna í skýrslunni sem kostar peninga. Þetta eru meira vangaveltur og í raun er þetta stefna um stefnu,“ segir Þorleifur.

Þorleifur segir markmiðið greinilega hafa verið að búa til stefnu sem kostar engan pening og svo sé bent í aðra átt. „Það eru engar haldbærar tillögur en bent á ríkið og önnur sveitarfélög til að koma með úrræði. Nær allur hópurinn er skrásettur í Reykjavík og á einn veg eða annan verður borgin að taka ábyrgð á þessum málaflokki.“

Áslaug Friðriksdóttir, borgarfulltrúi Sjálfstæðisflokks, var einnig í starfshópnum og tekur undir að haldbærar tillögur skorti en að vinna við aðgerðaáætlun sé eftir. Þá vinnu vill hún sjá í samstarfi við ríkið.

„Mikið af þeirri þjónustu sem við þurfum að veita þessum hópi er heilbrigðisþjónusta. Þess vegna þarf að efla samstarf við ríkið og þannig verður vonandi hægt að setja fram mælanlegri og skýrari markmið.“