Ósvífnir nethrappar ráðast á lögregluna

Lögreglan á höfuðborgarsvæðinu, hefur verið virk á netinu að undanförnu, að undirlagi lögreglustjórans sjálfs, Stefáns Eiríkssonar. Þetta þýðir að þeir hafa, líkt og aðrir netverjar, orðið að skotmarki óprúttinna netsvindlara.

Lögreglan á Facebook segir frá þessu sjálf um leið og hún varar við svindlpóstum í gegnum tölvupóst og aðra netmiðla, sem hún segir algenga. En, nú hefur steininn tekið úr, segir í skeyti frá lögreglunni:

„Í gær barst þeim sem þetta ritar tölvupóstur á netfang lögreglunnar þar sem viðkomandi var tjáð að hann hafi hlotið 3.vinning í stóru happadrætti. Fussumsvei.“

Sá sem heldur um penna í umboði lögreglunnar bendir á að vart þurfi að nefna, að þarna sé um svindl að ræða ... „og því gott að minna fólk á að svara slíkum pósti ekki heldur eyða strax. Að sama skapi er gott að við minnum yngstu og elstu tölvunotendurnar á hætturnar sem fylgja netinu enda þessir hópar ef til vill í mestri hættu hvað svona varðar.“

Post by Lögreglan á höfuðborgarsvæðinu.