Var ekki tryggð staðan fyrirfram

Magnús Geir Þórðarson nýr útvarpsstjóri segir umrótið innan Ríkisútvarpsins undanfarna mánuði hafa skapað erfiða stöðu en hann sé sannfærður um að Ríkisútvarpið eigi bjarta framtíð. Ekki hafi verið búið að tryggja honum stöðuna áður en hann sótti um hana.

Ráðning nýs útvarpsstjóra er síðasta verk fráfarandi stjórnar Ríkisútvarpsins. Kjósa átti nýja stjórn á Alþingi á fimmtudag en því var frestað og verður ný stjórn væntanlega kosin á þinginu í dag. Þrjátíu og níu manns sóttu um stöðu útvarpsstjóra og eftir yfirferð og viðtöl var þeim að lokum fækkað í fjóra sem stjórn ríkisútvarpsins ræddi við, þeirra á meðal Magnús Geir Þórðarson leikhússtjóra í Borgarleikhúsinu í gærkvöldi. Skömmu eftir það viðtal var tilkynnt að honum hefði verið boðin staðan.

Magnús Geir segir að hans fyrsta verk verði að hlusta á starfsmenn en hann sé sannfærður um að stofnunin eigi sér bjarta framtíð. Margir töldu Rás 1 hafa farið illa út úr nýlegum niðurskuðri.

„Ég held að Rás 1 sé ein af stoðum Ríkisútvarpsins og afskaplega mikilvægt að hlúa að henni og byggja upp til framtíðar. Þannig að klárlega er Rás 1 eitt af fjölmörgum spennandi verkefnum sem bíða,“ segir Magnús Geir.

Hann segir ljóst eftir atburðir undanfarinna mánuða að Ríkisútvarpið skipti fólkið í landinu miklu máli. Innan Ríkisútvarpsins sé frábært starfsfólk.

„En því er ekki að leyna að umrótið og niðurskurður síðustu mánuði hefur orsakað að það er að mörgu leyti erfið staða. En ég er sannfærður um að það ætti að vera hægt að vinna úr því og byggja upp RÚV sem siglir inn í bjarta og góða tíma,“ segir nýr útvarpsstjóri.

Margir höfðu spáð því að Magnús Geir fengi stöðuna og sumir fullyrtu jafnvel að hann væri sá umsækjandi sem Illugi Gunnarsson menntamálaráðherra vildi fá í starfið.

Var búiðaðhvíslaþvíaðþér aðþúværir nokkuðöruggur um aðfáþetta starf?

„Það var ekki búið að hvísla því að mér, nei. En hins vegar hugsaði ég málið afar vel áður en ég sótti um. Ástæðan fyrir því að þetta var erfið ákvörðun var einfaldlega að ég er í frábæru og skemmtilegu starfi í dag sem leikhússtjóri Borgarleikhússins,“ segir Magnús Geir.

Þess vegna hafi ekki verið sjálfgefið að freista þess að fara á annan vettvang en hann hafi metið það svo að reynsla hans gæti nýst í þessu spennandi viðfangsefni.

Þannig að hvorki stjórnarmenn né menntamálaráðherra höfðu ýjað að því að þú værir nokkuð öruggur með þetta?

„Nei, það var ekki þannig. Ég fékk hins vegar hvatningu úr ýmsum áttum, ekki síst frá fjölda starfsmanna Ríkisútvarpsins,“ sagði Magnús Geir Þórðarson nýr útvarpsstjóri.