Starfsmönnum í búfjáreftirliti fækkað úr 40 í sex

Ný lög um búfjárhald tóku gildi um áramótin og fluttust verkefni búfjáreftirlitsmanna til Matvælastofnunnar. Sex starfsmenn stofnunarinnar munu nú sinna starfi sem 40 búfjáreftirlitsmenn gerðu áður. Tilkynningaskylda dýralækna kemur nú framar þagnarskyldu.

 

Þessir 40 búfjáreftirlitsmenn sinntu um tíu til tólf fullum stöðugildum, en nýju starfsmennirnir sex verða allir í fullu starfi. „Um er að ræða fækkun stöðugilda en þannig næst ákveðin hagræðing í eftirlitinu engu að síður. Á móti kemur að það er einhver hagræðing í því að sömu aðilar séu að skoða búin og framfylgja lögunum,“ segir Hjalti Andrason hjá Matvælastofnun.

Þá er dýralæknum og heilbrigðisstarfsmönnum dýra gert skylt að fylgjast með meðferð, aðbúnaði, aðgerðum og meðhöndlun dýra. Einnig er þeim skylt að gera Matvælastofnun viðvart ef ætla má að aðstæður dýrs séu óviðeigandi. „Tilkynningarskylda samkvæmt þessari grein gengur framar ákvæðum laga eða siðareglna um þagnarskyldu viðkomandi starfsstétta,“ segir í lögunum. Koma mun í ljós hvort sú breyting muni skila inn fleiri ábendingum.

„Ekki verður farið í eftirlit á hvern bæ eins og tíðkast hefur og mun Matvælastofnun beina eftirlitinu þangað sem mest er þörfin, með tilliti til velferðar dýra og matvælaöryggis, þ.e. áhættumiðað eftirlit,“ segir í frétt á vef Matvælastofnunar. Stofnunin mun vinna að áhættuflokkun í búfjárhaldi og vinna eftir þeirri flokkun árið 2015. Á þessu ári mun slembiúrtak, ábendingar auk þekktrar sögu tiltekinna bæja ráða því hvar farið verður í eftirlit.

Samkvæmt áhættuflokkuninni munu þeir sem eru með fyrirmyndarbú fá helmingi minna eftirlit en meðalbú er talið þurfa skv. áhættuflokkun á meðan „búskussarnir“ fá helmingi meiri eftirlit. „Þannig fá fyrirmyndar bændur fjárhagslega umbun næstu árin (sleppa við eftirlit)  og eftirlitinu verður meira beint að þeim sem ekki standa sig.“