Vill leiða Ríkisútvarpið inn í nýja tíma

Magnús Geir Þórðarson, fráfarandi Borgarleikhússtjóri var í gær ráðinn Útvarpsstjóri R'ikisútvarpsins. 39 einstaklingar sóttu um stöðuna, og segir Ingvi Hrafn Óskarsson, stjórnarformaður Ríkisútvarpsins ohf, Capacent hafa séð um ráðningarferlið fyrir stjórnina.

Upphaflega hafi Capacent valið 11 umsækjendur til viðtals, framhaldsviðtöl voru svo tekin við 6 einstaklinga og svo kynntu fjórir umsækjendur framtíðarsýn sína á Ríkisútvarpið. Í kjölfarið var ákveðið að bjóða Magnúsi Geir stöðuna.

Ingvi Hrafn vill ekki staðfesta hvaða aðrir umsækjendur komu til álita á lokasprettinum.

Ingi Hrafn segir stjórnina vissulega hafa litið til þess að Magnús Geir hefur ekki reynslu af störfum í fjölmiðlum. Þar hafi þó vegið þyngra að hann sé gott leiðtogaefni og hafi skapað sér gott orð eftir gott gengi í leikhúsheiminum, bæði hjá Leikfélagi Akureyrar og nú síðast Leikfélagi Reykjavíkur.

Ingvi Hrafn vill lítið gefa upp um framtíðarsýn hins nýja Útvarpsstjóra og stjórnar RÚV og segir tímann leiða það í ljós hvort um sé að ræða mikla stefnubreytingu á rekstrinum.

Magnús Geir verður nú níundi maðurinn til að sinna starfi útvarpsstjóra. Hann segir að ákvörðunin um að sækja um starfið hafi alfarið verið hans, þó svo að hann hafi fengið hvatningu víðar.

"Ég er fullut tilhlökkunnar. Ríkisútvarpið er mikilvæg stofnun. Innviðirnir eru að mörgu leyti góðir þar þó auðvitað sé alltaf eitthvað sem megi breyta og bæta," segir Magnús Geir, og bætir við að hann hlakki til að leiða RÚV inn í nýja tíma. Hvað varðar nánari útfærslur á komandi breytingum segist Magnús vilja láta verkin tala.

Viðtalið við Magnús Geir má sjá í heild sinni á meðfylgjandi myndskeiði.