Menntamálaráðuneytið neitar að láta upplýsingar af hendi

Hjördís Birna Hjartardóttir lögmaður segir að  menntamálaráðuneytið  hafni því að gefa  upplýsingar um útgefin  leyfisbréf til kennara  frá og með 1. júlí 2011 til dagsins í dag. 

Í svari sem henni hafi borist frá ráðuneytinu segi að ráðuneytið telji það útheimta of mikla vinnu að safna saman þessum upplýsingum.

Eins og komið hefur fram í Fréttablaðinu telja um 100 kennarar sem luku þriggja ára kennaranámi á tímabilinu 2009 til 2012  að menntamálaráðuneytið hafi brotið gróflega á þeim við útgáfu starfsleyfa til kennara.

Á sama tíma og þeim var synjað um starfsleyfi fékk hópur skólafélaga þeirra með sömu menntun og próf leyfið.

Nemendurnir útskrifuðust frá Háskóla Íslands, Háskólanum á Akureyri og Háskólanum í Reykjavík.Árið 2008 voru sett ný lög um kennaranám. Nýju lögin áttu að gilda um alla þá sem hæfu nám eftir gildistöku laganna og áttu þeir að ljúka fimm ára námi til að fá starfsleyfi sem kennarar.

Hjördís Birna Hjartardóttir, lögmaður hópsins sem synjað hefur verið um starfsleyfi, segir að framkvæmd og beiting laganna innan stjórnsýslunnar hafi misfarist í mörgum atriðum, bæði innan háskólanna og af hálfu menntamálaráðuneytisins.

„Umbjóðendur mínir fengu fregnir af því að loknu námi að ráðuneytið væri að gefa út starfsleyfi til 15 skólafélaga þeirra. Það fólk hafði lokið þriggja ára námi en var skyndilega komið með starfsleyfi í hendurnar.

Umbjóðendur mínir hafa hins vegar allir fengið synjun þrátt fyrir að þeir hafi lokið sama námi.“ Hún segir að hópinn gruni að fleiri hafi fengið slík leyfi.

Umbjóðendur Hjördísar fóru þess á leit að ráðuneytið tæki upp mál þeirra og gæfi út starfsleyfi fyrir þá.

„Ráðuneytið hefur sagt að í einhverjum tilvikum hafi starfsleyfi verið gefin út fyrir mistök. Dæmin eru hins vegar of mörg til að það sé hægt að skýra þau á þann hátt. Það er ekki hægt að flokka þetta sem mistök, þetta er gróf mismunun,“ segir Hjördís  Birna.