Vignir frábær í fyrsta sigri Midtjylland

Vignir Svavarsson átti frábæran leik í 32-27 sigri HC Midtjylland á Lemvig-Thyborøn í danska handboltanum í kvöld. Vignir var með sex mörk úr sjö skotum í leiknum og eina brottvísun.

Eftir tap í fyrstu umferð gegn Skanderborg var mikilvægt fyrir Midtjylland að ná stigum á töfluna fyrir leik kvöldsins.

Lemvig-Thyborøn leiddi í hálfleik en gestirnir frá Midtjylland náðu að snúa taflinu við í seinni hálfleik og unnu að lokum öruggan fimm marka sigur. Með sigrinum skaust Midtjylland upp í 11. sæti dönsku úrvalsdeildarinnar.

Daníel Freyr Andrésson, markvörðurinn sterki, kom ekki við sögu í 26-23 sigri SønderjyskE á Skjern. Daníel sem gekk til liðs við SønderjyskE í vor sat á bekknum allan leikinn.

Úrslit dagsins:

SønderjyskE  26-23 Skjern

Lemvig-Thyborøn 27-32 Midtjylland

Ribe-Esjberg 23-18 GOG

Odder 23-33 Århus