Konur unnu afgerandi sigur í Hafnarfirði

Rósa Guðbjartsdóttir vann afgerandi sigur í prófkjöri Sjálfstæðisflokksins í Hafnarfirði í gær og leiðir listann fyrir bæjarstjórnarkosningarnar næsta vor. Konur skipa fjögur af sex efstu sætum listans.

Þrettán hundruð og fimm manns tóku þátt í prófkjöri Sjálfstæðisflokksins í Hafnarfirði í gær en Rósa Guðbjartsdóttir og Kristinn Andersen stefndu bæði á fyrsta sætið. Rósa fékk afgerandi kosningu í forystusætið með 597 atkvæðum eða um 46 % atkvæða.

Og ég er ákaflega, hrærð, stolt og ánægð með þessa niðurstöðu. Það sýnir sig að Sjálfstæðismenn í bænum kunna að meta mín störf á kjörtímabilinu og liðnum árum. Fyrir það er ég ákaflega þakklát og fyrir það traust sem ég fæ,“ segir Rósa.

Rósa atti kappi við Valdimar Svavarsson fráfarandi oddvita flokksins í Hafnarfirði í prófkjöri fyrir kosningarnar árið 2000 og þá munaði bara tveimur atkvæðum á honum og Rósu, en Valdimar bauð sig ekki fram nú. Rósa er fyrsta konan til að leiða lista Sjálfstæðismanna í Hafnarfirði.

„Jú, það er rétt. En það er ekki síður sögulegt sem gerðist í prófkjörinu í gær. Sjálfstæðismenn í Hafnarfirði voru að raða fjórum konum á meðal sex efstu frambjóðenda,“ segir oddvitinn nýji.

Á eftir Rósu koma Kristinn Andersen í öðru sæti, Unnur Lára Bryde í þriðja,

Ingi Tómasson í 4. sæti, Helga Ingólfsdóttir 5. sæti og Kristín Thoroddsen í því sjötta. Sjálfstæðisflokkurinn er nú með fimm af ellefu bæjarfulltrúum.

Ykkur vantar bara einn fulltrúa til að hafa meirihluta í bænum, ertu bjartsýn á að ykkur takist það?

„Ég finn fyrir gríðarlega mikilli sveiflu í okkar garð. Ég finn líka að Hafnfirðingar þrá að það verði breytingar við stjórn bæjarins. Og á undanförnum mánuðum  og misserum og ekki hvað síst í aðdraganda prófkjörsins finn ég fyrir miklum stuðningi við gildi okkar Sjálfstæðismanna og ég er bjartsýn,“ segir Rósa Guðbjartsdóttir nýr oddviti Sjálfstæðismanna í Hafnarfirði.