Rúmur milljarður á Facebook

Fyrir tíu árum síðan varð samskiptamiðill Facebook fyrst opnaður almenningi. Um 80% Íslendinga 13 ára og eldri eru skráðir á Facebook og samkvæmt nýlegri samanburðarrannsókn eru það eingöngu íbúar Katar sem nota samskiptaforritið vinsæla meira en við.

En hverju hefur tilkoma Facebook breytt?

"Ég held að Facebook hafi breytt samskiptavenjum fólks, og ekkert endilega til þess verra," segir Svava Pétursdóttir, kennslufræðingur hjá menntavísindasviði Háskóla Íslands, sem hefur stúderað notkun á facebook í kennslu og víðar.

Ein af grunnhugmyndum frumkvöðulsins Mark Zuckerberg og félagar hans í Harvard  var að stofna þar samskiptanet, sem yrði verðmætara og vinsælla með sífelldri aukningu á notendafjölda.

Það virðist í grófum dráttum hafa tekist nokkuð vel hjá Mark Zuckenberg, sem nú er einn auðugasti maður heims.

Á þriðjudaginn eru sem sagt 10 ár frá því Facebook leit fyrst dagsins ljós og á þessum áratug hafa um 1,23 milljarðar jarðarbúa skráð sig á Facebook. Það samsvarar um það bil íbúafjölda Indlands, eða fjölda Bandaríkjamanna og Evrópubúa samanlagt.

Ýmsar breytingar hafa orðið á Facebook gegnum tíðina, til dæmis eru einungis fjögur ár frá því þumalfingurinn vinalegi, "like-hnappurinn", varð að veruleika.