Gera ráð fyrir því að kalla inn skipin fyrir miðnætti

Landhelgisgæslunni barst tilkynning um leka í bát sem var á siglingu á Faxaflóa á þriðja tímanum í dag en gríðarlega umfangsmikil leit hefur verið að skipverjum í dag.

Upphaflega neyðarkallið kom frá báti við Akranes og í kerfi LHG og þar kom fram að leki væri komin að bátnum og að menn væru að fara í björgunargalla. Engar frekari upplýsingar hafa borist síðan og ekki vantar skip inn í tilkynningaþjónustuna hjá Vaktstöð siglinga.

„Minni bátar slysavarnarfélags eru allir hættir leit. Við erum áfram með björgunarskipin úti og þeir eru að leita í úthlutuðum hollum í austanverðum faxaflóa,“ segir Ásgrímur L. Ásgrímsson, framkvæmdastjóri aðgerðasviðs Landhelgisgæslu Íslands, í samtali við Vísi.

„Finnsku herþyrlurnar eru við það að hætta leit og það sama má segja um íslensku þyrlurnar tvær. Aðstæður eru virkilega erfiðar í lofti.“

„Við gerum ráð fyrir því að kalla inn skipin rétt fyrir miðnætti. Eins og fram hefur komið í dag er einskins bát saknað. Enginn neyðarsendir fór í gang og enginn neyðarflugeldur sendur á loft.“

„Ef við höfum engar vísbendingar fengið fyrir miðnætti þá munum við gera hlé á leit.“