Sigurjón íhugar að fara í skaðabótamál við íslenska ríkið

Sigurður G. Guðjónsson, lögmaður Sigurjóns Þ. Árnasonar, segir í samtali við fréttastofu að sýknudómur Héraðsdóms Reykjavíkur frá því í morgun komi sér ekki á óvart.

Aðspurður hvort að hann búist við að dómnum verði áfrýjað segir hann að það sé nánast reglan að öllu sem varðar bankamenn sé áfrýjað.

Sigurður hefur deilt mjög á sérstakan saksóknara og gagnrýnt rannsóknaraðferðir og málatilbúnað embættisins. Hann segist til dæmis ekki enn skilja hvers vegna Sigurjón var settur í gæsluvarðhald á sínum tíma.

„Hann var settur í gæsluvarðhald í  janúar 2011 í þágu rannsóknarhagsmuna sem að ég er ekki ennþá búinn að fá skilið hverjir voru. Það lá fyrir að Fjármálaeftirlitið og sérstakur saksóknari höfðu öll gögn Landsbankans undir höndum og hann gat ekki spillt neinum sönnunargögnum. Þannig að gæsluvarðhaldsúrskurður yfir Sigurjóni var klárlega ekki í þágu rannsóknarhagsmuna heldur einhverra annarra hagsmuna,“ segir Sigurður.

Þetta atriði, er þetta eitthvað sem þú verður að taka tillit ef að þetta ratar nú fyrir Hæstarétt?

„Nei, ég held að ég muni nú ekki fjalla sérstaklega um það en það kemur auðvitað til skoðunar þegar fjallað er um refsingar og refsiákvarðanir hvað menn hafa þurft að þola á rannsóknartímanum. Við skulum hafa það hugfast að Sigurjón var fyrst yfirheyrður vegna þessa máls og annarra mála í júlí árið 2009. Hann er eiginlega búinn að vera stöðugt í yfirheyrslum og dómsölum vegna vinnu sinnar í Landsbankanum jafnlangan tíma og hann vann í bankanum.“

Kemur til álita að hann fari í einhvers konar skaðabótamál á hendur ríkinu?

„Það má vel vera þegar upp er staðið en við sjáum bara hver verður niðurstaðan af öllu þessu argaþrasi sem hefur beinst gegn honum. Er hægt að taka menn úr sambandi í samfélaginu, halda þeim uppteknum af málsvörnum og yfirheyrslum, sitja svo kannski uppi sem saklausir menn, sem er náttúrulega í sjálfu sér ágætt, eftir 7-8 ár? Við skulum líka hafa það hugfast að það er ekki ennþá búið að ljúka rannsókn allra mála á hendur Sigurjóni hjá sérstökum saksóknara.“

Dóminn í heild sinni má lesa hér.