"Ég gæti dáið listrænum dauða og verið hamingjusöm að eilífu“

Lorde, sem hefur átt mikilli velgengni að fagna undanfarið með fyrstu breiðskífu sína Pure Heroine, var í viðtali við Rookie magazine um tónlistarferilinn, hvað veitir henni innblástur og hvatningu frá David Bowie.

Þegar söngkonan var spurð hverjar væru bestu stundirnar svaraði hún. „Mig langar ekki að monta mig, en þegar ég hitti David Bowie og hann sagði að hlusta á mig væri eins og að hlusta á rödd framtíðarinnar,“ sagði Lorde.

„Ég hugsaði með mér, ég gæti dáið listrænum dauða og verið hamingjusöm að eilífu,“ bætti hún við. 

Lorde, sem er sautján ára gömul, sló met árið 2013 þegar lag hennar Royals var í fyrsta sæti á Billboard Alternative-listanum lengur en nokkurt annað lag eftir söngkonu.