„Verð hissa ef ég sé meira en hundrað þúsund kall“

Hátt í sjötíu þúsund umsóknum um niðurfærslu á höfuðstól verðtryggðra húsnæðislána verður svarað eftir helgina en ríkisstjórnin kynnir niðurstöðuna á morgun.

Þegar að lokað var fyrir umsóknir í byrjun september höfðu 69 þúsund umsóknir borist frá 105 þúsund einstaklingum. Ríkisstjórn ákvað að settir yrðu áttatíu milljarðar í niðurfærsluna en hver og einn einstaklingur fær þó aldrei meira en fjórar milljónir.

Ásmundur Einar Daðason þingmaður Framsóknarflokksins og aðstoðarmaður Sigmundar Davíðs Gunnlaugssonar forsætisráðherra sagði í þættinum Sprengisandi á Bylgjunni í dag að meðalleiðréttingin verði á bilinu ein til tvær milljónir.

Gert er ráð fyrir að skuldaniðurfærslan komi öll til framkvæmdar í einu. Til að sjá hver áhrifin verða er hægt að skoða eins og hálfs milljón króna lækkun á láni sem ber 3,7% vexti. Ef það lækkar úr fimmtán milljónum í þrettán og hálfa fara mánaðarlegar afborganir 60.041 kr. í 54.049 kr. og lækka þá um 5.992 krónur á mánuði. Það þýðir um sjötíu þúsund krónum lægri afborganir á ári. Fréttastofa tók vegfarendur tali í dag til að forvitnast um væntingar þeirra til niðurfærslunnar og virtust þær hóflega hjá flestum. Þannig sagði Óskar Guðnason, einn viðmælendanna, að hann yrði hissa ef hann sæi meira en hundrað þúsund krónur.