Forseti Kielce: Við munum verja okkur

Ekkert virðist marka meinta afsökunarbeiðni sem forráðamönnum Rhein-Neckar Löwen á að hafa borist eftir leik liðsins gegn Kielce um helgina.

Handknattleikssamband Evrópu hefur nú hafið rannsókn á atvikum sem áttu sér stað eftir leik liðanna í Meistaradeild Evrópu um helgina. Eins og greint hefur verið frá mun Talant Dujshebaev, þjálfari Kielce, kýlt Guðmund Guðmundsson, þjálfara Löwen, fyrir neðan beltisstað eftir leikinn og bar hann svo þungum sökum á blaðamannafundi stuttu síðar.

„Ef að Löwen vill aðhafast eitthvað í þessu máli munum við verja okkur,“ sagði Hollendingurinn Bertus Servaas við Mannheimer Morgen í dag en hann er forseti Kielce.

Í gær greindi Thorsten Storm, framkvæmdarstjóri Löwen, frá því að Servaas hefði beðið hann afsökunar á framferði þjálfara síns strax eftir umræddan blaðamannafund. En svo virðist sem að hann hafi dregið í land með afstöðu sína.

„Þeir [hjá Löwen] ættu fyrst og fremst að huga að sínum eigin þjálfara. Ég hef lært eitt á mínum starfsferli - þegar tveir rífast er sjaldan aðeins einn sekur.“

„Ég veit ekki hvað gerðist nákvæmlega. Það gekk eitthvað á en ég varð ekki vitni að neinum slagsmálum.“