„Það þarf að horfast í augu við vandann“

Niðurstöður rannsóknar, sem sýna að börn á gráu svæði fái ekki nægan stuðning í grunnskólum, koma Ólafi Loftssyni, formanni Félags grunnskólakennara, ekki á óvart.

Fram kemur gagnrýni á að fjármagn vanti til að hægt sé að framkvæma hugmyndafræðina að baki skóla án aðgreiningar.

„Menn virðast ekki horfast í augu við að það þarf að koma svo miklu meira til ef við eigum að geta sinnt öllum þessum nemendum og veitt þeim nauðsynlegan stuðning,“ segir Ólafur. „Kennarar sinna svo mörgum öðrum verkefnum en kennslu, verkefnum sem ættu að heyra undir félagsmálayfirvöld og jafnvel heilbrigðiskerfið.“

Ólafur segir tvær leiðir í boði sem gætu bætt þjónustu grunnskólans. „Það þyrfti aukið fjármagn til að kennarinn geti sinnt öllum þessum verkefnum, hann þyrfti að kenna færri stundir og/eða vera með færri nemendur. Hin leiðin er að horfast í augu við að við séum komin of langt með þessa hugmyndafræði, spóla til baka og fækka þessum ætluðu verkefnum kennara.“

Ólafur segir niðurstöður síðustu Pisa-könnunar sýna að nemendum virðist almennt líða vel í grunnskólum landsins og að mörgum verkefnum sé sinnt vel, og þá jafnvel á kostnað námsþáttanna.