Elford-Alliyu skrifar undir mánaðarsamning við ÍBV

Eyjamenn hafa gert mánaðarsamning við hinn tvítuga framherja Lateef Elford-Alliyu en hann mun fá tækifæri á næstu vikum hjá þeim Hermanni Hreiðarssyni þjálfari og aðstoðarmanni hans David James. Þetta kemur fram á eyjamenn.com í kvöld.

Lateef Elford-Alliyu er fæddur 1. júní 1992 og uppalinn hjá West Bromwich Albion. Hann spilaði með Crawley Town í ensku C-deildinni í vetur en tókst ekki að skora í 11 leikjum. Elford-Alliyu fékk reyndar aðeins að spila í 232 mínútur því hann kom inn á sem varamaður í tíu leikjanna.

Tímabilið á undan skoraði Elford-Alliyu 2 mörk í 27 leikjum með Bury í ensku C-deildinni.

Lateef Elford-Alliyu lék á sínum tíma 9 leiki fyrir enska 17 ára landsliðið og skoraði í þeim eitt mark.