Rændi stúlku með sprautunál og fór í Bónus með kortið hennar

Tuttugu og tveggja ára gömul kona hefur verið dæmd í níu mánaða fangelsi og átján ára stúlka í sex mánaða fangelsi fyrir að hafa í febrúar í fyrra veist að annarri stúlku og ógnað henni með blóðugri sprautunál sem sú átján ára hafði meðferðis og krafist þess að stúlkan léti af hendi 66° norður úlpu sem hún klæddist.

Stúlkan, sem varð fyrir hótununum, hljóp á brott en við það missti hún skólatösku sína sem hin átján ára gamla stúlka tók og hafði á brott með sér, en í skólatöskunni voru þrjár skólabækur, lyklar og debetkort, samtals að verðmæti 12 þúsund krónur. Stúlkan fór svo í verslun Bónus við Lóuhóla í Reykjavík og sveik út vörur fyrir 5600 krónur með kortinu.

Bæði konan og stúlkan játuðu brot sín.