Ögmundur vill svör um hleranir Bandaríkjamanna

Ögmundur Jónasson, þingmaður Vinstri grænna, segist munu ganga eftir því að bandarísk stjórnvöld svari því formlega hvort íslenskir stjórnmálamenn hafi verið hleraðir á undanförnum árum og ef svo hafi verið, þá hverjir og af hvaða tilefni.

Þetta segir Ögmundur í nýjum pistli á heimasíðu sinni þar sem hann segist einnig munu birta svör Bandaríkjamanna opinberlega.

Í samtali við Vísi segir Ögmundur greinilegt að reiði alda rísi mjög hratt í Evrópu sem og að mótmæli fari einnig rísandi í Bandaríkjunum. Hann telur viðbrögð Bandaríkjamanna linkuleg hingað til miðað við tilefnið.

Enginn véfengi að þessar njósnir hafi átt sér stað, ekki heldur Bandaríkjastjórn segir Ögmundur í pistlinum, en að myndin eigi eftir að skýrast nánar.

Ögmundur telur að utanríkisráðuneytið eigi að kalla formlega eftir svörum frá Bandaríkjunum, en hingað til hafi ráðuneytið aðeins lýst yfir andstöðu og áhyggjum í kjölfar fréttanna.

Þá minnir Ögmundur á að áður hafi komið fram að íslenskir ríkisborgarar hafi verið hleraðir af Bandaríkjamönnum sem hann segir gróf mannréttindabrot sem og brot á íslenskum lögum, þar á meðal stjórnarskrá.