Þúsundum manna með lán í skilum hafnað um ný lán

Karl Garðarsson þingmaður Framsóknarflokksins sagði á Alþingi í dag að ný lög um neytendavernd geti orðið til þess að hátt í tuttugu þúsund manns sem ekki séu í alvarlegum vanskilum fái ekki lán.

Lögin voru sett í tíð fyrri ríkisstjórnar en tóku nýlega gildi. Karl segir margt jákvætt í lögunum, svo sem eins og upplýsingaskylda lánastofnana til þeirra sem taki neytendalán, en jafnframt þurfi lántakendur að gera nákvæmar grein fyrir fjárhagsstöðu sinni en áður.

„Þetta þýðir í raun að fólk verður að fara í greiðslumat ef það vill fá hækkun á kreditkortaheimild, yfirdrætti, bílaláni og fleiru. Kröfur um lánshæfi verða mun strangari en verið hefur,“ sagði Karl.

Nýu lögin hafi hins vegar ýmsar aukaverkanir. Nú séu um 28 þúsund manns á vanskilaskrá.

„Framkvæmdastjóri Creditinfo hefur látið hafa eftir sér að svo geti farið að þessi nýu lög þýði að fimmtán til átján þúsund manns til viðbótar verði hafnað um lán,” sagði Garðar.

Fólk sem ekki sé í vanskilum og alltaf greitt af sínum skuldbindingum geti verið hafnað um lán.

„Ef lánastofnanir telja líkur á að þú lendir í vanskilum getur það leitt til höfnunar þó svo að þú hafir alltaf borgað af þínum lánum. Ekki verður betur séð en að þessi nýju lög útiloki þúsundir manna í húsnæðisvandræðum frá frekari fyrirgreiðslu og að þetta fólk muni hvorki getað keypt né leigt,” sagði Karl.

Auðvitað sé gott að hvetja fólk til sparnaðar, en málið versni aftur á móti þegar huglægt mat ráði því hvort fólk geti staðið við skuldbindingar sínar í framtíðinni, sagði Karl Garðarsson.