Guðmundur Steinarsson skiptir yfir í Njarðvík

Guðmundur Steinarsson, markahæsti leikmaður Keflavíkur frá upphafi, mun leika með C-deildarliði Njarðvíkur í sumar en þetta kom fram í viðtali við hann á mbl.is í dag. Guðmundur var að hugsa um að leggja skóna á hilluna eftir síðasta tímabil en ákvað að slá til og spila með nágrönnunum í Njarðvík.

Guðmundur er orðinn 33 ára gamall og hefur spilað fleiri leiki og skorað fleiri mörk fyrir Keflavík í efstu deild en nokkur annar leikmaður í sögu félagsins.

Guðmundur er ennfremur í 10. til 11. sæti yfir markahæstu leikmenn efstu deildar með 81 mark og vantar aðeins sex mörk til að jafna Hörð Magnússon sem er í sjötta sætinu með 87 mörk.

Guðmundur skoraði 7 mörk í 22 leikjum með Keflavík í Pepsi-deildinni á síðasta tímabili og var þá markahæsti leikmaður liðsins ásamt Jóhanni Birni Guðmundssyni. Hann var einnig sá sem gaf flestar stoðsendingar en alls átti hann fjórar slíkar síðasta sumar.