Segist hafa verið hafður að fífli - sakborningar benda hvor á annan

"Símon er búinn að hafa mig að fífli,"sagði Jón Baldur Valdimarsson reiður í Héraðsdómi Reykjavíkur í morgun, en hann er ákærður fyrir að hafa lagt á ráðin og flutt inn nítján kíló af amfetamíni frá Kaupmannahöfn til Íslands í janúar síðastliðnum.

Mikið ber í milli í framburði Jóns Baldurs og Símonar Páls Jónssonar, sem sakaði Jón Baldur um að hafa skipulagt innflutninginn.

Símon Páll bar fyrstur vitni og lýsti aðdragandanum þannig að maður hefði kunnað leið til þess að koma fíkniefnum til landsins og úr varð að Jón Baldur á að hafa beðið hann um að fara með sér og flytja fíkniefni til Íslands. Með þeim í för var Jónas Fannar, bróðir Jóns Baldurs.

Þá heldur Símon Páll því fram að hann hafi einn daginn farið í tvær klukkustundir á barinn á meðan Jón Baldur á að hafa fundað með einhverjum, þegar Símon var kominn til baka voru fíkniefni komin á hótelherbergið og að Jón Baldur hafi haft blað með númerum og staðsetningum sem þurfti til þess að senda pakkana. Miðinn á að hafa verið handskrifaður.

Þessi framburður stangast þó alfarið á við framburð Jóns Baldurs sem segist hafa trúað því að til stæði að flytja þrjú kíló af amfetamíni til landsins. Hann hafi meðal annars tekið við tösku af fíkniefnum fyrir utan hótelið í ferðinni, og sagði fyrir héraðsdómi að hann væri viss um að það hefðu eingöngu verið þrjú kíló.

Símon og Jón Baldur fór því næst í Magasin du Nord þar sem þeir keyptu potta og fleira til þess að fela fíkniefni í. Jón Baldur bendir á að Símon hafi borgað það allt saman.

Bróðir Jón Baldurs, Jónas Fannar, sagðist hafa keypt flugför og pantað hótelgistingu fyrir félaga sína. Hann neitar hinsvegar að hafa lagt á ráðin um innflutninginn en allir játa þeir að það hafi átt að flytja fíkniefni til landsins þó deilt sé um magn og hver þeirra sé höfuðpaur í málinu.