Fá vörurnar sendar heim með Norrænu

„Það blundaði í okkur öllum að gera eitthvað sem er tengt heimilinu. Við erum allar fagurkerar og svona verslanir eru ekki á hverju strái úti á landi,“ segir Margrét Guðjónsdóttir sem ásamt Halldóru Malín Pétursdóttur og Ingibjörgu Grétarsdóttur opnaði nýverið lífsstílsbúðina Gullabúið á Seyðisfirði.

Búðin bíður upp á seyðfirska hönnun & handbragð, húsmuni og húsgögn í bland við gömul húsögn. Að sögn Margrétar fengu þær vinkonur hugmyndina að búðinni þegar þær voru allar í fæðingarorlofi síðasta vetur.

„Við vorum bara að spjalla saman og um hvað við gætum gert þegar fæðingarorlofinu lyki og fannst spennandi tækifæri að opna slíka verslun hér. Búðin er líka samnefnari fyrir önnur verkefni sem við tökum að okkur eins og innanhúshönnun og fatastíliseringar og fleira.“

Upphaflega var hugmyndin að vera með stemningsverslun yfir sumartímann, enda gríðarlegur fjöldi ferðafólks sem kemur til Seyðisfjarðar, segir Margrét.

„Okkur fannst vanta hérna vettvang þar sem listamenn gætu komið hönnun sinni meira á framfæri en það hefur komið okkur á óvart að fólk út um allt land er að versla við okkur og þá aðallega í gegnum Facebook-síðuna okkar. Við flytjum einnig inn vörur beint með Norrænu og það er alveg frábært að fá vörurnar beint á hafnabakkann hér heima. Þetta gengur svo vel að okkur finnst ómögulegt að skella í lás þegar fer að hausta, svo við stefnum bara ótrauðar á rekstur áfram í vetur,“ segir Margrét að lokum.