Stilla upp í tónlistarhátíð á Snæfellsnesi um helgina

Íslenska raftónlistarhátíðin Extreme Chill Festival 2013 – Undir Jökli verður haldin hátíðleg í fjórða sinn á Hellissandi á Snæfellsnesi nú um helgina.

Tónleikadagskrá hátíðarinnar byrjar klukkan 20 á föstudagskvöld og stendur nánast streitulaust til klukkan þrjú aðfaranótt sunnudags. 

Einnig verður boðið upp á jóga undir berum himni á fimmtudag, föstudag og laugardag.

Hátíðin nýtur mikillar hylli innan raftónlistarsenu Íslands og hefur kynt undir senunni síðustu misseri. Hún fer fram við rætur Snæfellsjökuls og segja hátíðarhaldarar að staðsetning og náttúra gefi veisluhöldunum aukinn byr undir vængi.

„Náttúruöflin og raftónlistin fléttast saman í kraftmikinn og gæsahúðarframkallandi kokteil sem hverfur seint úr minni hátíðargesta,“ segir í tilkynningu.

Hátíðargestir verja svefnstundum sínum og dægrum ýmist á tjaldstæði við bæjarmörk Hellisands eða í leiguhúsnæði innan bæjarins en tónlistaratriðin fara öll fram innan gamla félagsheimilisins Röst eða við útisvið þar hjá.

Um 20 íslenskir tónlistarmenn koma fram. Meðal þeirra eru Mikael Lind, Tonik, Samaris, Ozy, Úlfur, Stereo Hypnosis og Rúnar Magnússon. Einnig koma fram nokkrir erlendir tónlistarmenn frá Sviss, Egyptalandi og Bretlandi.

350 armbönd verða í boði á hátíðina í ár en síðustu tvö ár seldist upp. Hér fyrir neðan má sjá myndband frá hátíðinni fyrir tveimur árum.