Heilluð af fangelsum

„Ég hef alltaf verið mjög heilluð af fangelsum," segir Þóra Tómasdóttir, ritstjóri tímaritsins Nýs lífs og umsjónarmaður útvarpsþáttanna Inni ásamt myndlistarmanninum Arnari Ásgeirssyni.

Þættirnir Inni fjalla um þá sköpun sem hefur átt sér stað í íslenskum fangelsum gegnum tíðina og vekja þeir athygli á því hvernig fangarnir hafa tjáð sig í listformi á meðan þeir sitja inni. „Við tökum afbrotin og glæpina til hliðar og ræðum um ástandið að vera innilokaður og þörfina fyrir að skapa eitthvað. Það hefur alltaf verið sköpun í fangelsum þó að við höfum kannski lítið vitað af því."

Í fyrsta þættinum, sem er í dag klukkan 13, er greint frá sögu Bárðar R. Jónssonar, þýðanda Ríkissjónvarpsins. Hann sat inni á Litla-Hrauni fyrir þrjátíu árum og strauk. Það var upphafið að betrun Bárðar en er hann náðist aftur, eftir nokkurra daga sukk í Reykjavík, var hann settur í einangrun.

„Þar gerði hann merkilega uppgötvun og ákvað að snúa við blaðinu. Hann bað um að fá að afplána restina af dómnum í einangrun og fékk þar með næði til að skrifa og skapa. Hann hefur verið edrú í mörg ár og kemur í þáttinn með muni og ljóð sem hann gerði er hann sat inni."

Einnig verður fjallað um hljómsveitina Fjötra frá Litla-Hrauni, sem var mynduð í fangelsinu á níunda áratuginum af meðal annars Rúnari Þór Péturssyni tónlistarmanni og Sævari Ciesielski, og verður hlustað á plötu þeirra Rimlarokk. „Í formála plötunnar kemur þessi setning fram „listin dafnar aldrei betur en í einrúmi" en hún fangar hinn rauða þráð þáttanna."