Gary Payton í frægðarhöllina

Leikstjórnandinn Gary Payton fer fyrir þeim tólf körfuboltahetjum sem vígðar verða inn í frægðarhöll íþróttarinnar vestanhafs sem kennd er við upphafsmann körfuboltans, James Naismith.

Payton spilaði lengst af ferilsins með Seattle SuperSonics á vesturströnd Bandaríkjanna. Hann þótti mikið efni og var hann afar eftirsóttur í nýliðavalinu árið 1990. Svo fór að SuperSonics, sem hafði annan valrétt valdi hann, og varð hann að goðsögn hjá félaginu.

Payton var valinn varnarmaður ársins í deildinni árið 1996. Það ár fóru Payton og Shawn Kemp á kostum með SuperSonics sem fór alla leið í úrslitaleikinn gegn Chicago Bulls. Payton þótti hafa gott lag á að stöðva Michael Jordan sem þó hafði betur í einvígi þeirra.

Payton fékk uppreisn æru þegar hann varð NBA-meistari með Miami Heat árið 2006 en það var eini titill hans á ferlinum. Hann var valinn í stjörnuliðið níu sinnum og vann gullverðlaun með landsliði Bandaríkjanna á Ólympíuleikunum árið 1996 og 2000.

Rick Pitino, þjálfari nýkrýndra NCAA-meistara í háskólaliði Louisville, verður einnig vígður í frægðarhöllina. Hinir tíu eru:

Bernard King

Roger Brown

Guy Lewis

E.B. Henderson

Oscar Schimdt

Richard Guerin

Russ Granik

Sylvia Mitchell

Dawn Staley

Jerry Tarkanian

Athöfnin fer fram í september.