Woods: Úrslitakeppnin nálgast

„Ég myndi ekki segja að ég hafi átt erfitt í fyrri hálfleik“, sagði Keyshawn Woods þegar hann var spurður að því hvort hann hafi átt erfitt uppdráttar í fyrri hálfleik og hvað hafi svo gerst í seinni hálfleik. Hann var einungis með sex stig þegar leikurinn var hálfnaður.

„Callum var að finna sig vel og aðrir leikmenn í fyrri hálfleiknum. Ég var bara finna minn stað. Svo þegar komið var í þriðja leikhluta var númerið mitt kallað upp og ég komst af stað og hitnaði. Liðsfélagar mínir héldu svo áfram að leita að mér.“

„Við erum með fullt af gæjum sem geta hitnað og komist af stað. Körfubolti er leikur tveggja hálfleika og þriðji leikhlutinn var minn leikhluti og félagar mínir gerðu mér kleyft að halda áfram að gera vel.“

Var eitthvað sérstakt sem Valsmenn breyttu milli hálfleikja en Valur leiddi með átta stigum eftir fyrri hálfleik sem var í miklu jafnvægi?

„Nei, við vildum bara vera aggressívir á báðum endum vallarins. Við vildum spila hratt með boltann og án hans líka. Það er stíllinn okkar og það var markmiðið þegar við komum út úr búningsklefanum.“

Valur hefur unnið tvo leiki í röð og Finnur Freyr þjálfari talaði um það fyrir leik að hann vildi fara inn í landsleikjahléið á góðu nótunum. Hvernig metur Keyshawn Woods sjálfstraustið hjá Valsliðinu?

„Það er hátt. Þetta er þessi tími ársins. Við erum að fá smá pásu núna og erum eins og allir að reyna að gera okkur klára fyrir úrslitakeppnina sem nálgst óðfluga.“

Er Valur komið nálægt því að vera klárt í slaginn?

„Þið sjáið það þegar tíminn kemur. Þið munið sjá“, sagði Woods með glott sigurvegarans þegar hann kvaddi.