Sér ekki eftir hjónabandinu

Níu ár eru síðan leikarinn Ethan Hawke og leikkonan Uma Thurman skildu en þau felldu hugi saman árið 1997 á setti myndarinnar Gattaca.

„Gattaca var frábær stund í mínu lífi og frábær stund í lífi Umu Thurman. Við urðum mjög ástfangin. Við reyndum að vera eins bjartsýn og við gátum: við vildum trúa á ást og möguleikann á ást. Maður gerir sér betur grein fyrir því hve sterk ástin er þegar maður eldist. Þá skilur maður hvernig tilfinningar geta leitt mann í góðar áttir og hættulegar áttir. Ég sé ekki eftir því að hafa gengið ungur í hjónaband,“ segir Ethan í samtali við tímaritið Mr. Porter.

Ethan og Uma voru gift í sex ár en skildu árið 2004. Þau eiga tvö börn saman, dótturina Mayu, fimmtán ára og soninn Roan, ellefu ára. Ethan kvæntist barnfóstru þeirra, Ryan Shawhughes, árið 2008 og eiga þau tvö börn saman.