Kona með 14.200 e-töflur í farangrinum

Hollensk kona, á þrítugsaldri, sætir gæsluvarðhaldi vegna rannsóknar lögregunnar á Suðurnesjum á tilraun hennar til stórfellds smygls á fíkniefnum hingað til lands frá Brussel um miðjan október. Tollverðir stöðvuðu för hennar í Leifsstöð og reyndist hún vera með 14.200 e-töflur í farangri sínum.

Málið er í rannsókn og lögreglan á Suðurnesjum aflar meðal annars gagna frá löggæsluyfirvöldum erlendis. Fleiri hafa ekki verið yfirheyrðir vegna málsins.

Lögreglan minnir á fíkniefnasímann 800-5005. Í hann má hringja nafnlaust til að koma á framfæri upplýsingum um fíkniefnamál. Fíkniefnasíminn er samvinnuverkefni lögreglu og tollyfirvalda og er liður í baráttunni við fíkniefnavandann.