Hundadeilum í fjölbýlishúsum fjölgað

Deilumálum vegna hundahalds hefur fjölgað eftir að lögum um dýrahald í fjöleignum var breytt samkvæmt Heilbrigðiseftirliti Hafnarfjarðar- og Kópavogssvæðis.

„Það virðist vera ákveðinn stígandi í kvörtunum,“ segir Páll Stefánsson, staðgengill framkvæmdastjóra heilbrigðiseftirlitsins. Kvartanir á síðasta ári vegna hundahalds á Hafnarfjarðar- og Kópavogssvæðinu voru 115, þar af langflestar vegna lausagöngu hunda. „Það er óhætt að segja að nokkrir tugir kvartana séu vegna dýrahalds í fjölbýlishúsum,“ segir Páll.

Rúmlega tvö þúsund hundar eru á skrá á svæðinu og hefur þeim fækkað lítillega á þessu ári. Kvörtunum hefur einnig fækkað nokkuð á síðustu árum.

Samkvæmt fundargerðum heilbrigðiseftirlitsins á síðustu mánuðum hafa nokkur mál komið til kasta nefndarinnar. Í ágúst síðastliðnum komu tvö mál til meðferðar; annars vegar var farið fram á að hundur yrði fjarlægður úr fjölbýlishúsi á Norðurbakka og hins vegar var kvartað vegna skráningar hunds í Engihjalla í Kópavogi. Þá var lagt fram erindi húsfélags að Furugrund í Kópavogi þar sem kvartað var yfir áratugalöngu ónæði af kattahaldi í einni íbúð hússins.

„Þetta er frekar núningur en deilur,“ útskýrir Páll sem vill ekki taka afstöðu til þess hvort lögin séu slæm. „Það tekur alltaf tíma að aðlagast nýjum lögum,“ bætir hann við.

Lögum um katta- og hundahald í fjölbýlum var breytt árið 2011. Áður fyrr þurftu allir í fjölbýlishúsinu að veita samþykki sitt fyrir dýrahaldi í húsinu. Nú þarf gæludýraeigandi aðeins samþykki tveggja þriðjuhluta íbúa. Samkvæmt upplýsingum frá Heilbrigðiseftirliti Reykjavíkur hefur tilkynningum ekki fjölgað.

Árný Sigurðardóttir, framkvæmdastjóri eftirlitsins, sagði í samtali við Fréttablaðið að það væri hins vegar ákveðin óvissa uppi með lögin. Benti hún á úrskurð Úrskurðarnefndar umhverfis- og auðlindamála, en þar vildi íbúi í fjölbýlishúsi meina að allir hlutaðeigandi eigendur ættu óskoraðan rétt á að eiga og taka þátt í öllum ákvörðunum er varða sameignina, bæði innan húss og utan, og sameiginleg málefni sem snerta hana beint og óbeint. Því stæðust lögin ekki. Málinu var vísað frá þar sem kærufrestur var runninn út. Þar af leiðandi fékkst engin eiginleg niðurstaða í málið.