Rannsaka Kópavogslæk ofan í kjölinn

„Það er ákveðinn mælikvarði á heilbrigði lækjarins að það sé skemmtilegt líf í honum,“ segir Ómar Stefánsson úr Framsóknarflokki, sem í gær fékk samþykkta tillögu í bæjarráði um ítarlega úttekt á lífríki Kópavogslækjar.

Úttektina á að gera meðal annars svo hægt sé að meta hvort sleppa megi silunga- og laxaseiðum í lækinn. Fyrir fundinum lá svar Náttúrufræðistofu Kópavogs sem nú á einmitt að gera úttekt á læknum. „Þar segir að gera þurfi ítarlegri skoðun á læknum en að svo stöddu mæla þeir ekki með því að seiðum sé sleppt,“ segir Ómar um umsögnina.

Bæjarráð samþykkti með tveimur atkvæðum gegn einu tillögu Hjálmars Hjálmarssonar úr Næst besta flokknum um að láta meta kostnaðinn við tillögu Ómars.

„Það eru 300 manns á biðlista eftir félagslegu leiguhúsnæði og það er verið að draga saman í sérkennsluúrræðum. Hvar er forgangsröðunin?“ spyr Hjálmar.

Ómar segir Kópavogslæk eina af náttúruperlum bæjarins og eiga sér skemmtilega sögu. „Ég hef heyrt þvílíkar veiðisögur af því þegar menn upplifðu að vera með stórfisk á stönginni,“ segir Ómar sem kveður aðstæður hafa breyst.

„Þegar tjörn var gerð við enda lækjarins ofan við Hafnarfjarðarveg var gerð stífla. Þar af leiðandi gengur ekki fiskur þarna um nema á ofboðslegu flóði. Það er því ekki fiskgengd eins og var hér í gamla daga.“

Hjálmar segir hugmynd Ómars ábyggilega ágæta en ekki tímabæra því aðstæður séu ekki fyrir hendi. „Þetta er einhver þrákelkni í Ómari,“ segir Hjálmar Hjálmarsson.