Nagladekk eru best á ísi lögðum vegum

Nagladekk reyndust best á ísi lögðum vegum í nýrri könnun hjá fyrirtækinu Test World í Ivalio í Finnlandi. Fyrirtækið prófar dekk við allar helstu vetraraðstæður. Kaupendur könnunarinnar eru nokkur stærstu bílatímaritin á Norðurlöndum og rússneskt bílatímarit.

Á vefsíðu NAF, systurfélagi Félags íslenskra bifreiðaeigenda í Noregi, segir að munurinn á hemlunarlengd besta nagladekksins, Nokian Hakkapeliitta 8, og besta vetrardekksins á ís, Pirelli Icecontrol, hafi verið 14 metrar. Besta vetrardekkið í heildina var Michelin X-ice X13. Þar á eftir komu Nokian Hakkapeliitta R2 og Bridgestone Blizzak WS70.

NAF bendir á að mikill munur sé á því hversu miklu fé einstaka framleiðendur verja í þróun dekkja fyrir vetraraðstæður á Norðurlöndum. Vetrardekk þurfi fyrst og fremst að veita öryggi í snjó og á ís samtímis því sem þau þurfa að veita öryggi á blautu malbiki.

Fullyrt er að kaupi menn dekk frá framleiðanda sem ekki taki tillit til aðstæðna á norðurslóðum sé hætta á að dekkið geti reynst hættulega lélegt í erfiðum aðstæðum. Skoða þurfi vel eiginleika dekkjategunda til að finna þá tegund sem hentar aðstæðum heima fyrir.

Á vef Rannsóknarnefndar umferðarslysa er bent á að þótt mikill öryggisávinningur sé af negldum hjólbörðum ef ekið er reglulega á ísi lögðum vegum eða vegum með þjöppuðum snjó sé enginn ávinningur af nöglum undir öðrum kringumstæðum, svo sem blautu og þurru malbiki.

Mikilvægt er að aka ekki um á slitnum negldum hjólbörðum í hálku. Rannsóknarnefnd umferðarslysa bendir á að þegar nöglunum sé farið að fækka og dekkin farin að slitna aukist slysatíðnin og öryggisávinningurinn hverfi.