Pappírstunnur í mörgum litum

Reykjavíkurborg hættir á morgun að tæma gráar eða grænar tunnur borgarinnar sem innihalda endurvinnanlegan pappír eða pappa.

Borgin hefur að undanförnu auglýst breytingarnar og minnt íbúa á að þeir geti meðal annars hent pappír í bláar endurvinnslutunnur borgarinnar.

Íbúar höfuðborgarsvæðisins geta einnig keypt mosagræna endurvinnslutunnu frá Íslenska gámafélaginu og gráa endurvinnslutunnu með grænu loki frá Gámaþjónustunni.

Eygerður Margrétardóttir, deildarstjóri umhverfis- og úrgangsstjórnunar hjá Reykjavíkurborg, segir að borgin hafi reynt að greina tunnur borgarinnar frá öðrum í þeirri von að draga úr misskilningi.

„Græn tunna Reykjavíkurborgar er ekki hefðbundin endurvinnslutunna heldur ætluð undir blandaðan úrgang, eins og gráa tunnan, og er losuð í annað hvert skipti,“ segir Eygerður.